وصفه تنفع للعرايس خصوصا... ومافي مانع الملاقيف يتفضلون خخخخخخخ

[بنت الكويت]

وصفه تنفع للعرايس خصوصا... ومافي مانع الملاقيف يتفضلون خخخخخخخ

السلام عليكم

انا حبيت اعطيكم هالوصفه من اختراعي بس نتيجتها ميه ميه ولا فراخ الجمعيه
نعومة وازالة للخلايا الميته ونظافه وبياض بس عاد مو تجيني وحدة سمرة تقول ليش ماصرت بيضا!!
لا يعني يتوحد لون الجسم وتحسين شوي بفرق باللون مع الاستمرار مو من يوم وليله
انا هالطريقة قبل كنت كل ماشفت روحي فاضية سويتها
يعني بالاسبوع 3 او 4 مرات ومافي مانع تسوينها كل يوم خصوصا العروس ترى بتستفيد منها حيييييييييييييل


يالله جهزوا المقادير:

بطاطا وحدة متوسطه الحجم مسلوقة ومقشرة
علبة حليب سائل كي دي دي او حليب السعودية او المراعي كيفكم
يعني تقريبا كأس كبير حليب سائل
ملعقتين كبار هردة اللي هي الطحينه السائله اللي يسوون منها المتبل ويحطونها بالشاورما عرفتوها؟؟
ملعقتين كبار عسل
ملعقة كبيرة شوفان مطحون
ملعقه كبيرة طحين حمص
شوية مرة انا اخذ صخرتين صغار من المرة واطحنهم واحطهم
عصير ليمونه وحدة

خلطي المقادير كلها بالخلاط
بس اول شي حطي البطاط مع الحليب بالخلاط بعدين ضيفي الباقي عشان لايصير ماسك وايد ومايتحرك بالخلاط
واذا بالاخر طلع الخليط ماسك حييييل ضيفي زيادة حليب سائل لين تحصلين المزيج اللي تحسينه مناسب عشان تدهنينه بجسمج
تاخذين هالخلطه وتقعدين بغرفتج مو الحمام عشان حرام نعمة الله
تفرشين شرشف او نايلون كيفج
المهم دهني كل جسمج فيها بما فيها الوجه عادي وقعدي فيها كثر ماتبين انا البس دراعة قديمه واقعد اطالع تلفزيون ساعة كامله واغسل
يعني الوقت اللي يناسبج بس مو اقل من نص ساعه عشان يمديها تعطي مفعول
عقبها جيبي فوطه فيها ماي ومسحي جسمج عشان تشيلين الزايد عشان لما تدخلين الحمام ماتدخل نعمة الله حرام
المهم لامسحتي جسمج دخلي الحمام تسبحي وسوي سنفرة الليمون والملح انا احبها تنعم
او استخدمي سنفرة المشمش
او سنفرة لوريال ترى ممتازة وميه ميه جربوها
اذا ماتبين سنفرة تفركي عدل بليفه تكون تطلع الوسخ مو ليفه ناعمة ماتسوي شي
ولاخلصتي حطي بدي لوشن اي نوع تبين انا استخدم جونسون باللوز عجييييييييب وريحته حلوه وعندكم بدي لوشن دوف بدي سيلك هم ممتاز ينعم
وبس متى ماحسيتي لج خلق سوي هالطريقة وهي مثل ماقلتلكم تنفع حتى للوجه لانه كل شي فيها طبيعي وماتضر بالعكس بتوخر الحبوب لانه فيها ليمون ومرة
وبتوحد اللون وتبيض شويييييييييييه بس اللون اكيد مع الاستمرار يتوحد يروح كل السواد
وحتى الكوع والركب بتنعم اكثر
والمنطقه الحساسة اللي لاعبه فيكم ومطلعتلكم قرون بعد بيصير لونها موحد

يفضل انج مع الخلطة تسوين مرة بالاسبوع حمام مغربي
لانه يشيل الخلايا الميته وينظف ويفتح المسام
وهالشي بيساعد المكونات بالخلطة انها تتغلغل بالبشرة

انصح العرايس انهم يلتزمون بها قبل العرس بشهر 3 مرات بالاسبوع واوعدكم انكم ماراح تعانون باذن الله لامن حبوب ولا سواد ولا شي
اذا التزمتوا

يالله جربوا وقولولي النتايج شيصير معاكم