رد: من تجرأ من قطف هالياسمين

[بنت الكويت]

البارت 22

طلعت ياسمين من النفاس ... وراحت مع عمر بيت اهله .... خذت خلود معاها ....
دشو البيت ...
ياسمين و عمر : السلام عليكم
ام عمر : هلا هلا بجنتي هلا ( قامت سلمت على ياسمين )
ياسمين ( تطالع عمر مستغربه ) : هلا فيج خالتي .. شلونج
ام عمر : بخير دامكم بخير وصرتو عندي بالبيت الحين
ياسمين : عسى دوم انشالله
ام عمر : تعالو تعالو قعدو




راحت ياسمين سلمت على نوره ونوره خذت حمد مستانسه عليه ...
عمر : يلا انا اودي الاغراض فوق وانزل
ياسمين : ايي معاك عشان احط الاغراض
عمر : لا مو لازم بعدين نرتبهم
ياسمين : اوكي

صعد عمر فوق ... ام عمر قامت شوي شوي وراحت تطل وراه تتاكد انه صعد ....



ردت الصاله ...

ام عمر : عبالج بتستانسين وانتي قاعده عندنا ؟ والله ما اخليج تتهنين ياسمين ...
ياسمين : خالتي اشفيج ؟
ام عمر : تخلخلت عظامج بلا تخلخلت عظامج.. ويايبه ولدج معاج شحقه ؟ حق الازعاج بالبيت ؟ ( تخز خلود )

خلود طالعها ومسك ريل ياسمين ...
ياسمين : ماله داعي هالحجي خالتي
ام عمر : انا اوريج يا ياسمين ... الظاهر مو مكفيج انه يشرب وعنده بنات ؟ تبين اكثر صح؟
ياسمين : شنو ؟ انتي تدرين ؟
ام عمر : اي ادري وانا الي خليته جذي ... ويا مالج وتشوفين !!
ياسمين ( تطالع خلود ) : قوم ماما قوم

قامت ياسمين خذت حمد من نوره ومسكت ايد خلود وصعدت فوق ... كان عمر توه بينزل شافها صاعده

عمر : ليش صعدتي ؟
ياسمين : تعبانه برتاح
عمر : اشفيج ياسمين ؟
ياسمين : ولا شي .... ( لفت ويهها وكملت طريجها )





عمر نزل تحت ..
عمر : يما اشفيها ياسمين ؟
ام عمر : ويي اشفيها ؟ توها شزينها ما فيها شي
عمر : يماا !!
ام عمر : هو اشفيك ؟
عمر : بدينا عاد....

العصر عند بدر ....
راح البحر وسفط يم نور ... نزلو اثنينهم
نور : متاخر
بدر : راحت عليي نومه
نور : من متى تنام هالحزه انته ؟
بدر : مادري بس اليوم كنت حدي تعبان .. يعني بنام ساعه وطولت نمت اكثر
نور : ويي بدر ضعفت وايد هههه
بدر : اي كله منج كل يوم تمشيني اهني بالحر
نور : اي بس احلى عليك جذي
بدر : انا من زمان حلو
نور : ويهك !
بدر : اشفيج ويهي مو حلو ؟؟ ( التفت عليها و سوا روحه حول وعفس ويهه ومد بوزه )
نور : هههههههه استغفرالله




رن تلفون بدر ...
بدر : هذي امي ... مو تطلعين صوت تفضحينا
نور : اوكي
بدر : اششش ... الوووو ...
ام بدر : بدر شلونك حبيبي ؟
بدر : هلا يما بخير .. انتي شلونج ؟
ام بدر : انا زينه... اقول يما شعندك اليوم بليل ؟
بدر : ما عندي شي امريني

( نور مجابله بدر وقاعده تستعبط عشان تضحكه )

ام بدر : لا بس لولو بنت خالتك امس ردت من السفر ومسويلها عشى اليوم وكلنا بنروح قلت اشوفك تيي ولا ما تبي
بدر : اي صج تخرجت ؟
ام بدر : اي اسمالله عليها
بدر : اي خلاص عيل اشوفكم بليل

( نور تطالع بدر تسوي روحها بتناديه و بدر ماسك ضحكته غصب ويقولها اششش )

ام بدر : على خير انشالله يلا مع السلامه
بدر : مع السلامه ...
سكر التلفون وطالع نور ..
بدر : يعني بتضحكيني ها ؟؟؟؟
نور : هههه ( توخر عنه شوي ) توبه توبه
بدر : خلاص سامحتج
نور : اوكي ( قربت تمشي يمه وبدر رد سوا نفسه بيطقها ) لالالالا خلاص
بدر : هههههه هبله والله العظيم
نور : امممممممممم انا مو هبله انا خبله
بدر : الي اهوه المهم فيج وشه !
نور : ههههه هبله خبله مينونه الي اهوه بس ما تقدر تقول ما تفقد خبالي ؟
بدر : لا صراحه ماقدر ... مادري شبسوي اذا تزوجتي وخليتيني
نور : هههههه منو ياب طاري الزواج الحين
بدر : ناويه تعنسين ؟ بالحالتين محد بياخذج
نور : ليش محد ياخذني اشفيني ؟
بدر : ولا شي بس مو صاحيه
نور : ملييييييق



تمشو بدر ونور مثل كل يوم .. سوالف وغشمره وضحك ... رد بدر البيت
خذاله شور وارتاح شوي ليما صارت الساعه 7 قام بدل هدومه وراح بيت خالته...


كانو كل اهله موجودين .. دش سلم وقعد....

خالته ( ام احمد ) : بدر ! شدعوه ما تيي تزورنا ولا تسال ...
بدر : اسف خالتي انشغلت
ام احمد : عيارتك انشغلت قول ناسينا
بدر : وانا اقدر انسى احلى خاله بالدنيا ؟
ام احمد : يماااا منك تقص عليي بكلمتين
ام بدر : اي هذا اهوه بدر كله جذي
بدر : هههه اشفيكم عليي ! عيل وين لولو ما شفتها .. المفروض العشا حقها اهيه
ام احمد : مادري هالبنيه وين تختفي ! كل شوي اقوم ادورها فشلتني

دق تلفون بدر وكان عبدالله رفيجه الي داق
بدر : عن اذنكم ..... ( قام وراح غرفه صغيره يم الصاله كانت ظلمه بس الباب مبطل )
بدر : هلا عبيد
عبدالله : انته وينك ؟
بدر : اووو لهيت مع الاهل ونسيتك ... معزوم اليوم ماراح اييكم
عبدالله : انته مواعيدك خربوطه ترا
بدر : ههههههه لا خلاص بس اخلص امرك اخذ منك الدي في دي
عبدالله : ماني معطيك اياه هونت
بدر : ههههههههههههه نتفاهم لما اخلص
عبدالله : زين ماشي يلا باي
بدر : باي ..





التفت بدر بيطلع من الغرفه لقى لولو بنت خالته قاعده
بدر : انتي شتسوين اهني خرعتيني ؟
لولو : منحاشه
بدر : من شنو
لولو : من الي بره هههه
بدر : اول شي الحمدلله عالسلامه
لولو : الله يسلمك
بدر : ليش منحاشه منهم ؟
لولو : اففففف بدوور تدري فيني من يوم صغيره ماحب هاليمعات
بدر : بدوور بعينج ريال شكبري وعندي ولد طولج ليلحين بدور ؟
لولو : هههه يعني كبرت ؟ ولا جنه كنت تلعب معاي قبل
بدر : اوو صج نسيت انج كنتي واحد من الربع
لولو : هففف ماصخ ... على طاري ولدك الي طولي ... وينه ؟
بدر : عند امه
لولو : اممم صح ...
بدر : قومي قومي بره امج قاعده تدورج
لولو : اففففف استغفرالله
بدر : قومي وقعدي يمي نسولف
لولو : اوكي يلا
قامت لولو وقفت وكانت لابسه نفنوف وكعب عالي
وقف بدر يطالعها من فوق لي تحت
لولو : اشفيك تطالعني جذي ؟
بدر : مستغرب
لولو : من شنو ؟ ( قامت تطالع روحها )
بدر : من عقب ما كنتي تبوقين تي شيرتي وتلبسينه صرتي نفنوف وكعب ؟ والله كبرتي وصرتي بنيه
لولو : بدررررررر !! مليييييق
بدر : هههههههه اتغشمر معاج امشي
لولو : اوكي




طلعو بدر ولولو وقعدو بره....

بعد شهرين ... كلهم وضعهم مثل ما اهوه ما تغير .... ياسمين وام عمر على طول مناجر ... ام عمر تمثل انها تحب ياسمين جدام عمر .... بدر ونور كل يوم يشوفون بعض .. وعمر كل ويك اند يروح حق عزيز ولد خالته .... بس خف شويه عن قبل

يوم من الايام ... عمر كان توه راد من الدوام .. لقى خلود قاعد يلعب تحت ونوره ماسكه حمد تلعبه
عمر : السلام عليكم
نوره : وعليكم السلام
عمر : عيل وين ياسمين ؟ سيارتها مو بره
نوره : مادري طالعه من الصبح وخلت اليهال ما سالتها وين راحت
عمر : اوكي ( طلع تلفونه ودق عليها )

ياسمين : الووو
عمر : انتي وينج ؟
ياسمين : كاني عند باب البيت
عمر : اوكي يلا باي
ياسمين : باي ...




صعد عمر الغرفه فوق ...
وياسمين صعدت وراه بدقيقتين...

ياسمين : السلام
عمر : وين كنتي ؟
ياسمين : رد السلام اول
عمر : خلصيني وين كنتي ؟
ياسمين : كنت رايحه اقدم على وظيفه
عمر : نعم ؟
ياسمين : اشفيك ؟ قايلتلك انا هالحجي من قبل لا احمل
عمر : وانا قلتلج ماكو
ياسمين : ترا انا ما رحت قدمت المره الي طافت لاني كنت حامل مو عشان شي ثاني
عمر : تبينها عناد انتي صح ؟
ياسمين : يعني عمر شسوي بالبيت ؟ مليت !
عمر : امي واختي بالبيت
ياسمين : واجابلهم شحقه ؟ عشان امك تستلمني مناجر
عمر : امي مافيها شي معاج
ياسمين : عمر تقص عليي ولا على نفسك ؟ اثنينا ندري امك ما تحبني
عمر : ياسمين قلتلج وظيفه ماكو !
ياسمين : وانا قدمت عالوظيفه اليوم واذا قبلوني بداوم
عمر : عناد يعني ؟
ياسمين : دام هذا طبعك معاي اي عناد ! ليما تتعدل وترد مثل قبل
عمر : شيلي اغراضج وروحي بيت اهلج ورقتج بتوصلج الاسبوع الياي !
ياسمين : احسن بعد من هالعيشه الي عايشتها معاك


راحت ياسمين طلعت جنطه من الكبت وبدت تحط فيها اغراضها ....
عمر وقف طالعها مده وشافها من صجها قاعده تشيل هدومها .. هد البيت وطلع

[بنت الكويت]

البارت 23

راحت ياسمين طلعت جنطه من الكبت وبدت تحط فيها اغراضها...
عمر وقف طالعها مده وشافها من صجها قاعده تشيل هدومها .. هد البيت وطلع

طلعت ياسمين من غرفتها معصبه ...طلعت بتنادي الخدامه
شافت ام عمر بويهها تطالعها ومبتسمه باستهزاء ...

ياسمين : هفففف اعوذ بالله من ابليس
ام عمر : ويعه انشالله.... اشفيج تتعوذين شايفه ابليس ؟
ياسمين : استغفرالله العلي العظيم

راحت ياسمين غرفة اليهال حطت اغراضهم بالجنطه .. كانو اليهال والخدامه قاعدين يلعبون تحت ... ياسمين قعدت تنزل الجناط تحت شافتها خدامة خلود وراحت تشيل معاها وودوهم السياره...

راحت ياسمين بيت اهلها .... دشت لقت امها موجوده ... كانت ياسمين شايله حمد وخلود ماشي وراها والخدامه شايله جنطتين دخلتهم داخل وردت طلعت بره تييب الباجي



ام ياسمين : وييي اعوذ بالله ... شصاير ؟
ياسمين : تهاوشت مع عمر
ام ياسمين : ليش ؟!
ياسمين : على سالفة الوظيفه
ام ياسمين : ليش ؟! ليلحين مو راضي ؟!
ياسمين : يما عفيه مالي خلق اتحجى عن هالسالفه ...
ام ياسمين : ييبي ييبي حمد وروحي فوق ارتاحي
ياسمين : اوكي

ياسمين عطت امها حمد وصعدت فوق بسرعه ..... ركضت غرفتها وصكت الباب وقطت روحها عالفراش وبجت....

عمر قعد يفتر بالسياره ومتضايق حده .... راح الشاليه عند عزيز ...




عزيز : هلااا عمر ... مبجر اليوم
عمر : وين البطل ؟
عزيز : اشفيك ؟
عمر : خلصني وين
عزيز : كاهو اهناك في واحد

خذا عمر البطل وقام يشرب...

بعد جم ساعه ... وعمر حده كان دايخ...

عمر : تعبااااان عزوز تعباااااان
عزيز : اشفيك تعبان ؟ شصاير ؟
عمر : مادري ... ( يضحك ) انا ليش مالي حظ
عزيز : اشفيه حظك ؟!
عمر : لا امي مخليتني اتهنى مع مرتي ومرتي مو فاهمه شي
عزيز : تحبها ؟
عمر : ااااااخ احبها ؟ اموت عليها بس ماقدر عزيز ماقدر
عزيز : ما تقدر شنو ؟
عمر : مادري هههههه



مر اسبوع .... وكانت ياسمين ليلحين ابيت اهلها ... ومتوقعه ورقة طلاقها توصل باي وقت ... كانت كله قاعده بغرفتها وما تطلع كلش وحتى عيالها تقعد معاهم شوي ما تطول وايد

فجاه واهيه قاعده بغرفتها الصبح سمعت امها تناديها تحت... قامت غسلت ويهها وراحتلها

ياسمين :هلا يما ؟
ام ياسمين : تعالي يما شوفي
ياسمين : شنو ؟!
التفتت جان تلقى ورد شكبره ووايد وايد حلو ... وعليه كرت
درت انه الورد من عمر وراحت خذت الكرت تشوفه شنو كاتب
"" كل شي بالدنيا يتعوض ... الا ام حمد .... ناطرج ""
ام ياسمين : هاا ؟ شصاير ؟
ياسمين : يبيني ارد
ام ياسمين : بتردين ؟
ياسمين : شسوي بعد ... احسن من اني اتطلق مره ثانيه واقعد اهني
ام ياسمين : والوظيفه ؟
ياسمين : بداوم ومالي شغل فيه
ام ياسمين : الله يهديكم ....



راحت ياسمين فوق ونادت الخدامه معاها وقامو يشيلون اغراضهم ... حطوهم بالسياره ولما صار العصر راحت بيت اهل عمر ... طول الطريج قلبها كان يرقع .... وصلت البيت لقت سيارة عمر بره ارتاحت شوي....

سمت بالرحمن ونزلت وبايدها حمد وخلود كان عند بدر ....

دشت البيت ... كان عمر قاعد بالصاله يطالع تلفزيون ومنسدح عالقنفه...
شاف ياسمين داشه وبايدها حمد قام وقف على طول وابتسم ...

ياسمين : السلام ( مبتسمه )
عمر : كنت حاس انج يايه ( راح باس راسها ولمها )
ياسمين : عمررر لا تعور حمد
عمر : هههه ييبيه




خذاه باسه وقعد يطالعه ... رد التفت على ياسمين
عمر : خلود عند ابوه ؟
ياسمين : ايي
عمر : خل اروح انزل الاغراض من السياره عيل
ياسمين : اوكي

خذت منه حمد وقعدت الغرفه فوق ...

رد عمر ومعاه الجناط حطهم بالغرفه وقعد عالفراش يم ياسمين ولمها حيل ....

عمر : البيت مو حلو بدونج
ياسمين : عشان جذي راضيتني على طول صح ؟
عمر ( طقها على راسها ) : بلا دلع
ياسمين : هههه ولهت عليك
عمر : انا اكثر ... شلتي فكرة الدوام من بالج ؟
ياسمين ( طالعته ) : لا نتحجى عن هالموضوع الحين
عمر : يعني مو شايلتها من بالج صح ؟
ياسمين : عمررر ترا توني راده !
عمر : اااااخ خلاص اوكي ... ارتاحي الحين وبليل بنطلع نتمشى
ياسمين : اوكي
عالساعه 7 بليل قامت ياسمين بدلت وكشخت وطلعت مع عمر ...
واهمه نازلين تحت كانت ام عمر قاعده...

ياسمين : السلام عليكم .. شلونج خالتي ؟
ام عمر طالعتها ولفت ويهها
ياسمين التفتت طالعت عمر
عمر : يلا خل نمشي
ياسمين : اوكي .....




مشو عمر وياسمين وصلو لي باب البيت ...
ام عمر قالت بصوت عالي : وااااااي استغفرالله في ناس ويههم منجب لو شتسويلهم هم يردون
ياسمين وقفت خزت عمر ..
عمر : امشي عفيه امشي مالي خلق ترا
ياسمين : اوكي .. عشانك بس

راحو عمر وياسمين مطعم هادي قعدو يتعشون ويسولفون .. كان احلى يوم بحياتهم اثنينهم .. خلصو من العشا وراحو تمشو شوي بالسياره وبعدين دشو سينما وطلعو من الفلم متاخر وردو البيت ......





بعد شهر ...
انقبلت ياسمين بالوظيفه الي قدمت عليها ... وقالت حق عمر ...

عمر : ياسمين وبعدين مع هالموضوع ؟ سكريه خلاص
ياسمين : لا ماني مسكرته ! وبداوم !!!!!!!!!
عمر: انا مقصر معاج بشي ؟
ياسمين : قلتلك مليون مره لا ... بس ابي اتسلى بالشغل
عمر : بتعانديني ؟
ياسمين : فسرها مثل ما تبيها بس راح اداوم
عمر : خلاص اوكي
ياسمين : صج ؟!
عمر : اي صج ... بس شرط !
ياسمين : شنو ؟!
عمر : من اليوم ورايح مالج فلس واحد عندي
ياسمين : انت اشفيك تروح وترد عالفلوس ؟!
عمر : ماروح وارد عالفلوس ... بس دام انتي تقولين انج مو محتاجه فلوس خلاص اعتقد ما تبين شي مني بعد ! اعتمدي على نفسك
ياسمين : اوكي !!

[بنت الكويت]

البارت 24

عمر : ماروح وارد عالفلوس ... بس دام انتي تقولين انج مو محتاجه فلوس خلاص اعتقد ما تبين شي مني بعد ! اعتمدي على نفسك
ياسمين : اوكي!!

مرت شهور وياسمين بدت دوامها ... وتعرفت على بنات معاها وصارو رفيجاتها ...
كانت علاقة عمر وياسمين شوي بارده بهالفتره .. او تقدرون تقولون ما كان لهم شغل ابعض كلش الا اذا كان في شي مهم يكلمون بعض.... ولو انه عمر كان يحاول يتعدل شوي وروحاته حق عزيز قلت وايد عن قبل ....

يوم من الايام ...
ياسمين توها راده البيت لقت عمر بالغرفه
ياسمين : السلام
عمر : وعليكم السلام ...
ياسمين : راد مبجر
عمر : ماخذ اجازه اسبوعين ..... ترا رحت البنك اليوم وبطلت حساب باسم حمد كل شهر بينزل فيه 200 دينار غير الي انا اعطيج اياه حقه اوكي ؟
ياسمين : حق شنو ؟!
عمر : بس حقه ... على ما يكبر الا يكون عنده فلوسه حق دراسته او اي شي ثاني اهوه يبيه
ياسمين : اوكي

بدلت ياسمين هدومها وردت التفتت لى عمر ...

ياسمين : متى بنرد بيتنا بروحنا ؟
عمر : ماراح نرد قاعدين اهني
ياسمين : لي متى ؟
عمر : مادري ما فكرت
ياسمين : اوكي
عمر : ليش مضايقتج القعده اهني ؟
ياسمين : لا عادي
عمر : اوكي ....



العصر .... بدر رايح يشوف نور مثل كل يوم ... لقاها قاعده بالسياره تتكلم بالتلفون .. شافته سكرته ونزلت
نور : هااااي
بدر : اهلين .... اول مره اشوفج تتكلمين بالتلفون
نور : ههه صج ؟
بدر : اي !
نور : هذي وحده معانا بالدوام توها متوظفه صارلها اسبوعين
بدر : اخيرا صار عندج رفيجات ؟
نور : ههههه ومنو قالك عمره ما كان عندي رفيجات ؟
بدر : لا مو قصدي جذي ... بس قصدي انه انشالله تكون قريبه منج حيل مثل اختج
نور : لا مابي ... كافي رفيجتي من بعيد لي بعيد...
بدر : ليش يعني ؟
نور : امممم يمكن اول مره اتحجى عن هالشغله بس انته بدور يعني عادي
بدر : ههه قولي
نور : كنت اعرف وحده .. ما كانت بس رفيجتي .. كانت اختي ... عرفتها جم سنه ... وكنا طول اليوم مع بعض ... نطلع ونروح ونرد مع بعض .. وقتنا كله مع بعض .. ساعات تنام عندي بالبيت وساعات انا انام عندها ... وحتى اذا كل وحده ببيتها كنا ندق نسولف مع بعض .. يعني تقدر تقول ما نفارق بعض كلش .. انا وياها كنا نفس الثانويه .. وتخرجنا ودشينا نفس التخصص .. ولو انه نسبتي كنت اقدر ادش فيها تخصص احسن بس قلت ادش معاها عشان نظل على طول مع بعض حتى نفس المحاضرات تقريبا ....
بدر : اوكي ؟!
نور : بس ... عقب ما تخرجنا اهيه توظفت بمكان وانا بمكان ثاني .... حاولت انا اظل معاها مثل قبل عادي ما تغيرت .... بس قامت اهيه تتهرب ..
بدر : شلون ؟!
نور : مو قصدي تتهرب ما تبيني بس تصرفاتها قامت تخليني اتحسس منها شوي ..... يعني صج ما كنا مجابلين بعض كثر قبل ... بس قامت تبدي باجي رفيجاتها عليي .... ورفيجاتها مو معاها بالدوام حتى عشان اقول معذوره مجابلتهم على طول ... بس لما اقولها خل امرج اقعد معاج تقولي لا عندي شغل ولا بطلع مع رفيجتي مواعدتها ....... اشياء وايد تصيرلها تقولهم حق رفيجاتنا الي قبل وما تقولي انا ... انا كنت انصدم من كلامهم انه شلون انا الي كنت اعرف عنها كل شي فجاه الكل يعرف الي يصيرلها الا انا !
بدر : وبعدين ؟!
نور : بس ...... اهيه وخرتني عن حياتها .. وخرتها عن حياتي
بدر : ليش يعني ما واجهتيها ؟ ليش ما قلتيلها انها متغيره وهالشي مضايقج
نور : وليش اواجهها ؟ لي متى اعلمك ؟ الي ما يبينا ما نبيه !
بدر : هههههه اي صح نسيت... بس هذي انتي تقولين خوش بنيه عنها ليش ما تبينها تصير best friend ?
نور : مالي خلق كل هاللويه مره ثانيه .. بس الي ياني من رفيجتي الي قلتلك عنها يكفي عن اي شي 100 بنيه تقدر تسويه فيني ... وطبعا تعرفت على بنات غيرها وهم ما عجبوني او عليهم حركات غريبه فـ وخرت عن كل البنات
بدر : اهااا اوكي عشان جذي قمتي ترافجين شباب ؟
نور : ارافج شباب ؟ شايفني كل يوم مع واحد يا شقول ؟!
بدر : -ههههههه اتغشمر
نور : زيييييين سامحتك



بعد يومين ...
ياسمين كانت قاعده بغرفتها وهذي حالتها من فتره بس عشان ما تحتك بام عمر وتقط عليها حجي مثل كل يوم .... دش عمر الغرفه..

عمر :السلام
ياسمين : هلا

راح قعد يمها ...
ياسمين : اشفيك ؟ شنو بعد ؟
عمر : سوومه .. ادري اني ظلمتج وايد من خذيتج .. وادري اني وايد مقصر بحقج.. بس انتي تدرين اني احبج
ياسمين : الحب بروحه مو كافي عمر ... شالفايده تحبني وانا مو مرتاحه ؟ لا مرتاحه لا معاك انته ولا مع اهلك ... ولا حتى مع عيالي... مو قادره اخذهم والعب معاهم وين ما ابي عشان بس ما اشوف بامك وتشتغل عليي تنغز
عمر : ياسمين فكينا من سيرة امي ... كل ما صار شي قلتي امك وامك
ياسمين : عمر تنكر انه اهيه سبب كل الي احنا فيه ؟ تحلف انه مو اهيه الي قالتلك تعالو سكنو عندي ؟
عمر لف ويهه وما رد عليها
ياسمين : والله ودي اعيش حياة طبيعيه معاك ! ومع عيالي .... بس مو قادره .. كل شي قاعد يصير عكس الي انا ابيه !
عمر : انا اسف .. اوعدج كل شي يصير احسن
ياسمين : نطلع من البيت ؟
عمر : الا هذي ياسمين .. ماقدر
ياسمين : ليش ؟!
عمر : امي تبيني اقعد عندها
ياسمين : عمر انا ولا امك ؟
عمر : ياسمين لا تخيريني !
ياسمين : رد علي
عمر : قلتلج لا تخيريني !




ياسمين قامت خلت عمر وبتروح غرفة اليهال ... بطلت الباب وشاف ام عمر كانت واقفه قاعده تتسمع .....

ياسمين طالعتها مصدومه اول شي ... بعدين التفتت على عمر ........

ياسمين : هااك !! شوفة عينك !!!!!!
ام عمر : شنو الي شوفة عينه بعد ؟
ياسمين : وقفتج عن الباب ! شنو بعد ؟!
ام عمر : انا كنت يايه اشوف عمر يبي عشى ولا لا
ياسمين : والي يبي يسال عن العشى يسال باذونه ؟
ام عمر : صج جليلة حيا ... ( تطالع عمر ) ما تسكت مرتك !!!!!!
عمر : ياسمين خلاص
ياسمين : انا الي خلاص ؟! شوف عينك كانت واقفه عند الباب تسمع
ام عمر : ما كنت قاعده اسمع لا تتبلين
عمر : يما ! ياسمين ! خلاص عاد فكوني ... كل يوم مشاكل كل يوم وحده فيكم تتحلطم ! خلااص !! انا مليت !!! افففف




قام عمر راح صوب الباب وخرهم وطلع من البيت ....

ام عمر : شفتي ؟! كله منج خليتي يطلع من البيت معصب !!
ياسمين : كله مني انا ؟! لي متى يعني ؟ انتي شتبين مني ! منقصه عليي عيشتي !
ام عمر : مابيج ماحبج طلعي من بيتي فكيني ... لا انتي من مستوانا ولا تشرفينا
ياسمين ( تتحجى ببرود ) : حتى لو طلعت بيظل حمد ولدي وانتو اهله يعني ما فرقت هم في شي يربطني فيكم !
ام عمر : لا حبيبتي هذا مو ولدنا ولا لنا شغل فيه ما نبيه ....
ياسمين : استغفرالله العلي العظيم... وخري بس

وخرت ياسمين ام عمر عنها وراحت غرفة اليهال وصكت الباب عليها ... وسمعت ام عمر تصارخ بره
ام عمر : هين ياسمين ! صدقيني راح اطلعج من البيت ! وتشوفين !!!!!!
ياسمين انسدحت على فراش خلود وقامت تبجي ...
خلود : ماما ليش تبجين ؟
ياسمين : مافيني شي ماما
خلود : ماما عوده طقتج ؟
ياسمين : لا ماما ما طقتني
خلود قرب من امه وقعد بحضنها ..



نامت ياسمين بغرفة اليهال .... ثاني يوم الصبح يا عمر يقعدها
عمر : ياسمين ... ياسمين
ياسمين : هلا
عمر : ليش نايمه اهني حبيبتي ؟
ياسمين : اشش لا تقعد اليهال ... روح الحين يايه وراك
عمر : اوكي


راح عمر وراحت وراه ياسمين ...
عمر : ليش نمتي اهناك ؟
ياسمين : انته توك راد البيت ؟
عمر : اي
ياسمين : وين كنت ؟
عمر : مع ربعي ... ليش نايمه اهناك
ياسمين : بس ... عن اذنك وراي دوام
عمر طالعها وما قال شي .

[بنت الكويت]

البارت الاخير ....

ياسمين : بس ... عن اذنك وراي دوام
عمر طالعها وما قال شي .....

راحت ياسمين بدلت هدومها وحطت ميك اب خفيف وطلعت....
عالساعه 10 عند ياسمين بالدوام .....



ياسمين كانت لاهيه بالشغل ومنزله راسها وحده مالها خلق شي
.... : السلام عليكم
رفعت ياسمين راسها ... لقت عمر
ياسمين : عمر ؟! شيايبك ؟
عمر : اشفيج منصدمه ؟
ياسمين : مادري ... استغربت
عمر : انزين يلا قومي
ياسمين : وين ؟
عمر : قومي بنطلع
ياسمين : والدوام ؟
عمر : استاذني... وباجر طارئة ماراح تداومين
ياسمين : انزين عيل خل اروح دقيقه بس وارد انطرني اهني
عمر : اوكي .. ( مبتسم )
راحت ياسمين عند خذت استاذان وراحت حق عمر ...
ياسمين : يلا مشينا ؟
عمر : يلا اوكي
ياسمين : الحقك بسيارتي ؟
عمر : لا عطيني سويجج انا الي بسوق
ياسمين : وسيارتك ؟
عمر : مو ياي فيها انا ...
ياسمين ( ابتسمت ) : اوكي



عطته مفتاح سيارتها ومشو...

بالطريج ....
ياسمين : عمور وين بنروح ؟
عمر : ماراح اقولج
ياسمين : يلا عاااد
عمر : واخرب المفاجاه ؟ انسي
ياسمين : يالمليييييق
عمر : حني لي باجر ماراح اقول
ياسمين : هههه اوكي بسكت


وصلو عمر وياسمين فندق ...
ياسمين : ليش يايين اهني ؟
عمر : بس بنقعد اهني طول اليوم
ياسمين : صج ؟!
عمر : اي ... حجزتلنا جناح وبنقعد فيه
ياسمين : واليهال ؟
عمر : وصيت الخدامه عليهم لا تحاتين .. ونوره وامي بالبيت يعني انشالله مافيهم شي
ياسمين : اوكي ..



نزلو عمر وياسمين وراحو الجناح الي حاجزينه وقعدو يسولفون ويضحكون ....

العصر عند بدر ونور ....
قاعدين يتمشون ويسولفون ... دق تلفون نور ...
نور : الووو .... هلا حنين... اي معاي بس انا مو بالبيت... عالبحر اتمشى... خلاص تعالي ناطرتج... باي
بدر : منو هذي ؟
نور : رفيجتي الي بالدوام الي قلتلك عنها
بدر : قلتيلها ناطرتج .. بتيي اهني ؟!
نور : اي تبي مني شغله وحاطتها بالسياره انا واهيه قريبه قالت ايي اخذها منج
بدر : اها اوكي

عشر دقايق ووصلت حنين .. راحو نور وبدر صوب السياره بس بدر وقف بعيد وقاعد يطالعهم ...



حنين خذت الي تبيه من نور ومشت ... ونور ردت صوب بدر
بدر : مو جنها كبيره ؟
نور : لا شكو ..
بدر : مادري شكلها جذي
نور : اشفيه شكلها بعد
بدر : مافيه شي قصدي من بعيد عبالي كبيره اكبر منج
نور : لا شكو
بدر : نوووور افففففف ! اسف اني تحجيت سامحيني مو قصدي ... اروح اصلي ركعتين استغفر ؟!
نور : هههههههههه اتغشمر اتغشمر
بدر : انزين هه




بليل ...
ياسمين وعمر تعشو والحين قاعد يحلون...
عمر : هاج اكلي
التفتت ياسمين وعمر كان يبي يوكلها بايده... ابتسمت وقربت تبي تاكل ... حاش خشمها شوي عمر : ههههههه
ياسمين : طالع شسويت
ضحكت وقامت بتمسحه
مسكها عمر : لحظه لحظه
ياسمين : شنو ؟!
عمر : باكلها
ياسمين : هههههه وخر وخر
عمر : صدقيني باكلها
ياسمين : هد ايدي بقوووووم
عمر : ما اخليج !
قام عمر مسكها وياسمين تضحك وتدزه ... سدحها عالقنفه وماسك ايدها واهيه تلف ويهها
عمر : خليني اكلها
ياسمين : ماكوووو




ضحكو وهدها عمر .. ياسمين حطت راسها على جتفه
عمر ( يمسح على شعرها ) : اشفيج ؟
ياسمين : من زمان ما استانسنا جذي
عمر : ادري ... ياسمين قاعد احاول اتعدل والله بس...
ياسمين : ادري ادري ماله داعي تقول ... عمور ادري انه هذي امك وما تقدر على زعلها ... وانا ما اقولك زعلها ولا اخيرك بيني وبينها ... بس كل شي له حدود انته شايفها شلون قاعده تتحكم بحياتنا ... خل طلعتنا من البيت مو لازم نطلع اذا انته ما تبيها تزعل .. بس كلامها معاي طريقتها شلون تعاملني .. انا مرتك شلون ترضى علي ؟!
عمر : ياسمين ودي بس ما اقدر اوقف بويهها ما اعرف هذي امي
ياسمين : بنعيش جذي للابد يعني ؟!
عمر : لا ... خل نغير الموضوع لا نخرب وناستنا
ياسمين : ههه اوكي ولا يهمك




ثاني يوم الصبح قامو عمر وياسمين وتريقو واستانسو بقعدتهم شوي وبعدين طلعو بيردون البيت...

وصلو البيت .. نزلو واول شي سووه دشو غرفة اليهال .... بطلو الباب لقو حمد نايم وخلود قاعد يلعب مع الخدامه ... وماسك مخدته
خلود ما شافهم بطلو الباب معطيهم ظهره ويطالع الخدامه
خلود ( ياشر عالمخده ) : ماما نامت مني .... ريحته صارت حلوه

ياسمين طالعت عمر وضحكت
عمر : حلاته يهبل
خلود التفتت شافهم استحى ... راحله عمر شاله وقاعد يلعب معاه
ياسمين ليلحين واقفه عند الباب طالعت الخدامه : عطيني حمود




راحت الخدامه بتييب حمد ..... ام عمر كانت توها طالعه من غرفتها وشاف ياسمين عند الباب ...
ام عمر : شرفتي ؟
ياسمين التفتت : هلا خالتي
ام عمر : وين كنتي ؟
ياسمين : نعم ؟!
ام عمر : وين كنتي ؟ ولا عشان ريلج ما رد امس رحتي نمتي بره عبالج محدب يسال او محد بيقول حق ريلج ... لا حبيبتي انتي اذا مو متربيه ووصخه لا تيين توصخين بيتي !
ياسمين : خالتي شهالحجي ؟
ام عمر : تخلخلت عظامج بلا تخلخلت عظامج ... روحي روحي حق الي كنتي عنده امس بليل
ياسمين بطلت باب الغرفه كله ...
ياسمين : سامع امك شتقول ؟!
عمر حط خلود وطلع من الغرفه وصك الباب ...
عمر : يما روحي غرفتج
ياسمين : هذا الي قدرت عليه ؟! امك تطعني بشرفي وانته كل الي قدرت تقوله روحي غرفتج؟
عمر : ياسمين خلاص تعوذي من ابليس
ياسمين : عمر لي اهني وخلاص عاد ما اتحمل اكثر من جذي انا ... سمعتها باذونك شنو قالتلي... لي متى بتحمل هالحجي منها انا ؟
ام عمر : شتبين يقولي ؟ ولدي هذا ما يقدر يقولي شي
عمر : يما تكفين روحي غرفتج
ام عمر : لا ماني رايحه ... واطرد هالوصخه هذي من بيتي يلا مابي اشوفها اهني
ياسمين : عمر !!!!!!!
عمر : استغفرالله ... بس عاد !!!!
ياسمين : ماشي يا عمر ... ماشي !
راحت ياسمين بطلت غرفة اليهال ... طالعت الخدامه : شيلي اغراض اليهال بنروح بيت ماما
عمر : ياسمين لحظه!!
مشت ياسمين وما ردت عليه ...
راحت غرفتها وقعدت تشيل اغراضها ....
دش وراها عمر عقب جم دقيقه ...
عمر : ياسمين عفيه ....
ياسمين : بس ولا كلمه مابي اسمع منك شي ... انا تحملت الي محد يقدر يتحمله !! قلت ميخالف ريلي وحبيبي !!!!! بس عقب كل شي شفته منك خلاص ماقدر اتحمل اكثر من جذي .. عبالك مادري انك تشرب ؟ عبالك مادري عن سوالفك مع البنات ؟ عبالك مادري انك دخلت بنيه بيتي وانا موجوده فيه !! تدري شحسيت فيه وقتها ؟ اكيد ما تدري ! تدري امك جم مره تغلط عليي وانا اسكت عشانك ؟! بس خلاص عمر والله خلاص ماقدر اتحمل اكثر ...




راحت ياسمين شالت حمد ونزلت مع خلود وركبو السياره ... الخدامه راحت وراهم مع الجناط وراحت ياسمين بيت اهلها ....

بيت ام ياسمين ....

ياسمين : السلام عليكم
ام ياسمين : وعليكم السلام.... متهاوشه مع عمر ؟
ياسمين : لا ... مع ام عمر
ام ياسمين : لا حول ولا قوة الا بالله... ليش يما هذي خالتج ؟؟
ياسمين : خالتي تتحجى عني وتقولي روحي حق الي كنتي نايمه عنده ؟
ام ياسمين : وييي اعوذ بالله شهالحجي ! قلتي حق عمر ؟
ياسمين : قلتله ؟ كان موجود ! ولا رد عليها !
ام ياسمين : روحي يما روحي غرفتج ...
ياسمين : اوكي .. يما عفيه اليهال
ام ياسمين : لا تحاتين ...




عقب يومين ...
بدر قاعد مع نور ..
نور : بدور شرايك بحنين ؟!
بدر : الي يت ذاك اليوم ؟!
نور : اي ..
بدر : حليوه .. ليش ؟!
نور : شرايك تتزوجها ؟
بدر : ها ؟
نور : اشفيك انصدمت ؟ ولا كنت ناوي تقعد بدون مره للابد ؟
بدر : مادري مو مفكر بالموضوع...
نور : بدوور ما تبي يهال غير خلود ؟ يصير عنده اخوان ! ما تبي وحده تدير بالها على خلود واهوه عندك غير الخدامه ؟!
بدر : اي بس مو الحين
نور : ليش مو الحين ؟ ترا حنين خوش بنيه
بدر : مادري
نور : اممممممم فكر وعطني رايك
بدر : اوكي ...





ثاني يوم الصبح ... بدر دق على نور
نور : بدر ؟! فيك شي ؟
بدر : لا اشفيج مخترعه انته ليش جذي ؟
نور : مادري داق من الصبح اشفيك ؟
بدر : اممم كنت بقولج اخذي رقم ام حنين عشان اقول حق امي تدق عليها
نور : صججججججج ؟!
بدر : اي صج
نور : انزين يلا باي باي
بدر : ههه باي



بعد 3 اسابيع...
ملج بدر على حنين ... وكانت نور وايد مستانسه وطايره من الفرح .. وطبعا ما قامت تكلم بدر ولا تروح معاه ... بدر وحنين بس سوو ملجه ما كانو يبون عرس ...

مرو 5 اشهر ...
ياسمين كانت طول هالمده عند اهلها ... عمر ما كان يسال عنها ... واذا يبي يشوف حمد كان يروح الصبح بيت اهلها يشوفه ... بس ما كان يكلم ياسمين كلش وكان يوصي امها ما تقولها شي ...
ملج بدر على حنين ... وكانت نور وايد مستانسه وطايره من الفرح .. وطبعا ما قامت تكلم بدر ولا تروح معاه ... بدر وحنين بس سوو ملجه ما كانو يبون عرس ...



يوم من الايام ... ياسمين كانت حاسه بضيقه ... طلعت وراحت تتمشى شوي ... لقت كافيه نزلت قعدت فيه ... قعدت تفكر بكل شي بينها وبين عمر .... من عرفته لي اليوم.... دزتله مسج " مر شهر واحنا ما ندري فيه عن بعض ... مشاكلنا وايد وماراح تخلص .. احبك بس كل شي له حدود .. اذا تبينا نتفاهم انا موجوده ! واذا ما تبي سو الي انتي تشوفه صح "
غمضت عيونها ودزت المسج ... رفعت راسها




شافت جدامها بدر ... قاعد مع حنين ومبين عليهم الوناسه
قعدت تطالعهم وتذكر ايامها مع بدر وشلون كانت وايد ظالمته معاها ....
شافها بدر قعد يطالعها ويطالع ويهها شلون تغير من الهم ... قامو اهوه وحنين بيمشون ...
لازم يمرون عند طاولة ياسمين .. بدر مسك ايد حنين ومشو يم بعض
ياسمين طالعت حنين .. بطنها كان شوي طالع... بين انها حامل توها وتوه طالعلها بطن...
قبل لا يمرون يمها وصلها مسج وكان من عمر " انتي طالق "
رفعت راسها صارت عينها بعين بدر .... دمعت عيونها ... بدر لف ويهه ومشى ... واهوه يضحك ويسولف مع مرته ........


النهايه


الي بتسال عن بدر الصجي : مو متاكده والله اذا تزوج ولا لا بس اعتقد انه لا !
ياسمين : ليلحين عند اهلها ومع عيالها وعمر يدق يسال عنها مرات بس ما يفكر يشوفها ولا يقعد معاها .. دزلها مسج انتي طالق بس اهيه ليلحين على ذمته لا تسالوني شلون مادري :p
عمر : قرر انه يتزوج وحده ثانيه ومو كويتيه وفقيره جدا جدا وام عمر حدها متحسفه انها خلت ياسمين تطلع والحين عمر بييبلهم وحده مثل هذي بسبة الي سوته امه مع ياسمين .. يعني الي قالته " انا خليت هذيج تطلع لانها موسنعه ومو من مستوانا واييبلي وحده اخس بوايد.. لو مخليه هذيج احسن "

الي ابي اغلب البنات يفهمونه من القصه...
فكري بعقلج قبل قلبج ... ولا تظلمين احد وتقولين ماقدر احب ريلي لاني كنت احب قبله ! الريل طول عمره غير والعشره معاه غير !!
مو كل واحد عرفتيه وحبيتيه ولو ظليتي معاه سنين قبل الزواج معناتها تعرفين طبعه وتتاكدين انه بعد الزواج بيظل جذي للابد ! ( هالسالفه وايد نتهاوش عليها انا وريريز وانشالله تتعلم الدرس من القصه لووول )

نشوفكم بقصة يديده انشالله وسامحوني اذا قصرت معاكم بشي او زعلت وحده فيكم :$
راح اشتاقلكم وايد وايد

[بنت الكويت]

اشكرج يالعضوة cute princess 
امتعتينا وبكيتينا وسهرتي عيونا ودموعنا فديتج لا هنتي .

[بنت الكويت]

تعديل سريع و غبي عالبارت ....



*بعد 3 اسابيع...
ملج بدر على حنين ... وكانت نور وايد مستانسه وطايره من الفرح .. وطبعا ما قامت تكلم بدر ولا تروح معاه ... بدر وحنين بس سوو ملجه ما كانو يبون عرس ...

*مرو 5 اشهر ...
ياسمين كانت طول هالمده عند اهلها ... عمر ما كان يسال عنها ... واذا يبي يشوف حمد كان يروح الصبح بيت اهلها يشوفه ... بس ما كان يكلم ياسمين كلش وكان يوصي امها ما تقولها شي ...
ملج بدر على حنين ... وكانت نور وايد مستانسه وطايره من الفرح .. وطبعا ما قامت تكلم بدر ولا تروح معاه ... بدر وحنين بس سوو ملجه ما كانو يبون عرس ...


الجمله معيوده مرتين بالغلط لووووووووووووول
وعلى فكره انا كنت اقصد حنين وبدر ملجو وسكنو مع بعض ما كانو يبون عرس مو عبالكم عندهم نية عرس لوووووووول
اسفين عالغلط الفني :